Сестра ми исто така живее во странство. Не планира да се врати во Македонија. Пола од моите пријатели живеат, работат и создаваат во Прага. Другата половина се во Дубаи. Сите на високи позиции во одлични компании. Не планираат да се вратат во Македонија. Пријателка од средно работи на еден од најголемите австриски универзитети. Не планира да се врати во Македонија.

И сега што да правиме ние? Да седиме со скрстени раце? Да гледаме мајки како плачат по аеродроми бидејќи нивните деца не можат да извадат ни за леб во Македонија? Да гледаме само како младите ја напуштаат земјава? Да гледаме како младите успеваат во другите земји а не во Македонија? Да гледаме  колку многу се тие ценети во другите земји а тука никој не знае за нив? Доволно го правевме ова. Сега е време за акција.

Сега е време да ставиме прст на чело и еднаш засекогаш да се запрашаме- каква иднина ќе градиме ние без нашите млади? Не знам за вас ама јас сакам светла иднина. Сакам Македонија со која сите ќе се гордееме. Единствениот начин да го направиме тоа е да почнеме да ги цениме младите. Да почнеме да им ги даваме на младите условите кои ги заслужуваат. Да не ги пуштаме туку така да си одат. Ако веќе си отишле да направиме нешто за да се вратат. Доста беше од седење со скрстени раце. Ако сите се согласуваме дека Македонија треба да има светла иднина тогаш таа иднина мора да ја градиме со младите во прв ред.

Време е да се разбудиме!

The post Каква иднина ќе градиме без нашите млади? appeared first on Kosta Petrov.

Не би рекол за мене дека сум голем патриот. Бар не во типична смисла на зборот. Се гордеам што сум од Македонија но никогаш не би се придружил на толпата која секојдневно вее македонски знамиња и има тетоважи од Егејска, Вардарска и Пиринска Македонија. Немам апсолутно никакви предрасуди кон нив, едноставно во мојата глава патриотизмот има многу поразлично мислење. Многу подуховно.

Секојдневно на најразлични портали сум сведок на најразлични размислувања, толкувања, текстови, есеји, полемики и разговори за нашата земја. Она што ги поврзува сите овие дискусии е негативната енергија која сите ние ескпресно ја искажуваме кон нашата земја. Ретко ќе прочитате некој позитивен коментар. Ако го има, веднаш под него следува друг коментар дека личноста која искоментирала е симпатизер на власта и ред други приказни кои доведуваат до тоа и најмалата позитивна искра да биде загушена со омраза и предрасуда.

Седејќи дома и читајќи ги коментарите и мислењата на сите овие личности не можев а да не се запрашам – До кога ние ќе ги обвинуваме другите за хаосот во нашиот живот? До кога Македонија ќе ни биде крива на сите за нас, за нашите неуспеси, за нашите падови, за нашите неисполнети соништа.

Основното правило на сите духовни науки е дека универзумот ќе ти даде тоа што ти ќе го посакаш. Дали ја сфаќате тежината на овие зборови? Дали  ја сфаќате нашата одговорност во цела оваа ситуација? Знаете ли што значи ова? Ова значи дека со секој наш коментар, со секоја наша негативна мисла за нашата земја, за нашиот живот, ние не само што придонесуваме за нејзиниот тотален колапс туку создаваме простор за креирање на таков хаос во нашите животи, што ни следните 10 генерации нема да можат да го оправат.

Мораме сите, ама апсолутно сите да ја преземеме одговорноста за тоа што се случува во нашата земја. Како што сите славевме кога нашите кошаркари триумфираа во Европа, со таа иста енергија, со таа иста жар, ние самите треба да ја преземе одговорноста за лимбото во која се наоѓаме и кое станува нашата секојдневна реалност.

Тоа е само првиот чекор, полесниот чекор. Најтешкиот чекор е тотална елиминација на реактивноста на македонскиот народ. Како ќе го направиме тоа? Едноставно е луѓе. Во секоја ситуација во нашите животи имаме две можности:  да избереме хаос или да избереме среќа. Ние упорно го бираме хаосот. Во секоја ситуација во модерната македонска историја ние помеѓу двете опции, апсолутно секогаш го бираме хаосот, иако во сите моменти имаме можност да ја избереме и среќата. А знаете ли зошто го бираме хаосот? Бидејќи така е полесно. Бирајќи го хаосот не мора да се промениме. Бирајќи го него, ја прифаќаме ситуацијата таква каква што ние мислиме дека е. Темна, мачна, депресивна.

Луѓе, светлина секогаш има, дури и кога е најтемно. Ако не можеме да ја видиме не значи дека не постои, дека не не чека да ја откриеме и внесеме во нашите животи.

Знаете што, работите никогаш не се толку црни како што изгледаат. Универзално правило на човечкото постоење и развиток е дека преку најголемите предизвици ќе дојдат најголемите награди во нашите животи. Ја сфаќате ли моќта на овие зборови? Сите овие предизвици кои секојдневно и се случуваат на нашата земја се знак дека според универзумот работите се токму такви какви што треба да бидат. Сфатете дека сите ние ја креиравме оваа ситуација за да ја научиме најголемата лекција за нашето постоење.

А таа лекција е едноставна! Тоа што ќе го пуштиш надвор во универзумот тоа и ќе си го добиеш назад.

Ние секојдневно испуштаме омраза, завист, љубомора и што добиваме за возврат. Па токму тоа што сме го заслужиле- хаосот.

И сега кажете ми кој е крив за ова што ни се случува нас? Македонија ли е крива или ние самите сме си криви?

Кога последен пат наместо да опцуеме некого сме избрале да им кажеме благодарам за ова искуство, те сакам. Кога? Никогаш луѓе, никогаш. А сме ја имале таа опција. Секогаш ја имаме другата опција. И се додека ја бираме погрешната опција, хаосот ќе биде дел од нашиот живот.

Знаете што, мене ми е жал за Македонија. Не ми е жал за нас. Ние го добиваме токму тоа што му го испраќаме на универзумот. Ние го добиваме тоа што сме го заслужиле.

Запрашајте се убаво и размислете. Каква земја сакаме да имаме? Ако сакате хаос супер, уживајте во хаосот, но сигуренн сум дека искрено во себе сите сакаме хармонија, мир, среќа, нели? Тогаш ајде сите ние по малку да започнеме да ја креираме таа иднина. Дај да го засадиме тоа семе на позитивност. Можеби ќе му треба време да порасне но сме го засадиле и еден ден ќе порасне и ќе роди плодови и тогаш нашите деца ќе ни бидат благодарни за тоа што намесот хаос сме избрале среќа.

Ве молам, утре, денес, во моментов, не дозволувајте негативната мисла да ве совлада. Колку и да е темно верувајте во светлината, таа секогаш постои. Таа чека на нас. Но нема да стигнеме до неа ако се одалечуваме од неа.

Би сакал да завршам со една приказна која секогаш ми е инспирација во тешки моменти.

Тројца луѓе се заглавени во темна просторија. Прст пред око не се гледа,

Првиот почнува да ја слави светлината како најмоќен бог. Вториот почнува да гради црква и да се моли да дојде светлината.

Знаете ли што направил третиот?

Го нашол штекерот и запалил светло.

Ајде и ние да го запалиме светлото.

The post Да, светлината ја има дури и во Македонија appeared first on Kosta Petrov.

Денес во нашата земја постои реалност на беда, на сиромаштија, на скршени соништа, на скршени луѓе. Тоа е едната реалност. Онаа која ни е презентирана. Онаа која ние секојдневно ја конзумираме, односно одбираме да ја конзумираме. Не велам дека е лесно. Никому не му е лесно. Но постои и друга реалност. Реалност во која луѓето не се жртви. Реалност во која тие секојдневно работат да го променат сопствениот свет а потоа и светот на другите. Можеби нема да прочитате за нив во нашите медиуми. Можеби не се интересни, токму поради тоа што не се вклопуваат во шаблонот на беда и на патење. Не се вклопуваат во сликата дека Македонија е земја во која соништата умираат. Но изборот, не заборавајте е ваш. Вие самите ја креирате вашата реалност. И токму поради ова имате право да знаете дека во нашата земја има луѓе кои го менуваат светот. Луѓе кои го носат светот тука. Луѓе кои без разлика на се, без разлика на тоа колку е црна ситуацијата, не се предаваат. Знаете ли зошто не се предаваат? Бидејќи знаат дека филмот на нашиот живот го креираме ние самите. И никој друг.

Го пишувам овој текст бидејќи од дното на моето срце сакам да им одадам почит на луѓето кои секојдневно продолжуваат да се борат за да ја променат перцепцијата на оваа земја. Нема за нив да прочитате на Фејсбук. Тие не се борат за насловни страни. Не им се потребни. Среќни се бидејќи работат на своите соништа. Среќни се бидејќи знаат дека среќата ние самите ја бираме во нашите животи. И јас сум среќен со нив, бидејќи знам дека и јас мојата битка за вистината не би можел да ја водам без нивната помош.

Среќен сум бидејќи во Македонија постои компанија која ги работи специјалните ефекти за некои од најголемите холивудски филмови. Тука, кај нас, во нашиот главен град, постои компанија која докажува дека и од Македонија може да се менува светот. FX3X секојдневно ја менува перцепцијата за Македонија во светот. Тие се доказ дека ние не сме земја на беда, туку земја на иновации.

Среќен сум бидејќи ја знам Тања Кокев. Замислете, во земја каде модата за многумина е само хоби, таа минатата недела ја снимаше рекламата за првиот македонски парфем од моден дизајнер. Тања минатата недела ја започна модната револуција во Македонија, од Македонија. Можеби многумина ќе кажат нема пазар во Македонија за вакви работи. Нека кажат. Секогаш ќе има луѓе што само ќе зборуваат. Нека зборуваат.

Среќен сум што пред една недела бев на кафе со Ерхан. Не знам дали го познавате но Ерхан заедно со неговиот татко минатиот месец во Русија ја освоија првата награда на интернационалниот фестивал за мандолински орекстри. Не знам дали некој напиша за нивната победа. Не знам ни како ги собраа парите да заминат на пат до Русија. Но тоа е апсолутно неважно во овој момент. Важно е дека победија. Дека ги одрбанија боите на Македонија и покажаа дека и кај нас има уметност. И кај нас има култура.

Среќен сум што Јелена Јованова глуми во хрватска серија. Не се откажува девојката. Никогаш нема да се откаже бидејќи знае дека ја чекаат големи работи и само големи работи во животот. И знам, и сигурен сум дека еден ден ќе читам за неа во некој светски магазин и ќе си речам, Јелена ти си Македонија. Ти си сонот. Ти си таа што избра среќа а не беда како многумина од нас. Ти си таа што сама ја креираш својата реалност.

Среќен сум што Њу Момент, агенција од Македонија освои Лав во Кан. Знаете ли што е тоа? Тоа е како да сте добиле Оскар. Дури и поголемо од тоа. Тоа е остварување на животен сон. Тој Лав, што е за некого само статуа за другите е доказ дека соништата се остваруваат, колку и да изгледаат нерално, тие се остваруваат и ќе се остваруваат. Тој Лав е доказ дека и во оваа земја во која редовно се промовира беда и корумпираност постојат компании кои не ја прифаќаат реалноста таква каква што ни е презентирана

Знаете ли за што друго сум среќен? Во недела започнува школата за Млади Лидери организирана од Претседателот на Република Македонија. Четврта година по ред нашиот Претседател ги собира најголемите умови во Македонија и им ја дава можноста да креират реалност во која тие се победници. Да, токму тој Претседател за кој многумина ќе кажат дека нема лидерски способности, токму тој се бори за новите лидери на Македонија. Но вие не сакате да ја прифатите таа реалност. Во ред е. Не треба ни да ја прифатите. Но тоа не значи дека таа реалност не постои. Постои драги луѓе. Постои за сите нас. Но ние упорно одбиваме да ја прифатиме.

Можеби нашиот Претседател не е Обама, а не ни треба да биде. Можеби не влегува во калапот во кој ние сакаме да влезе но верувајте ми, за 5-6 години, лидерите кои ќе ја променат оваа земја ќе бидат луѓето кои биле и се дел од неговата школа. Тој е доказ дека лидер не е некој што треба да не води. Напротив. Лидер е оној кој ги инспирира другите и им ја дава можноста да ја креираат својата најдобра верзија.

Сите оние кои не ги спомнав а знам дека се многу, со вас сме. Не се предавајте. Ќе се бориме. Ќе се бориме и ќе докажеме дека и на ова парче земја постојат луѓе кои го менуваат светот. Одиме до крај. Одиме до победа. Креираме нова реалност. Кој сака нека се придружи, вратите се отворени. Изборот е наш и само наш.

The post Можеме и ние appeared first on Kosta Petrov.

Да би можел да го вратам времето би променил многу работи но за жал тоа не можам да го направам. Она во што сум сигурен е дека сите работи кои ни се случиле како компанија морале да ни се случат за ние да бидеме тоа што сме денес. Знам дека ќе се случат и други, мал милион работи, некои ќе бидат добри а некои лоши но сите тие ќе бидат дел од созревањето на нашата компанија. Всушност, најголемите лекции се учат од најголемите падови и ако сте навистина силни и верувате во вашата визија, сите овие падови и проблеми ќе ве однесат на патување кое ќе го промени вашиот живот засекогаш. Би сакал со вас да споделам пет работи кои јас ги научив на ова мое патување. Пет работи кои, сега кога размилувам, би сакал мене некој да ми ги кажеше пред три години. Но така требало да биде. Лекцијата сум требал сам да ја научам. Исто како и вие што ќе треба сами да ја научите вашата. Најважното од се е да ги споделуваме научените лекции бидејќи само така ќе знаеме дека всушност во оваа битка не сме сами. Не има многу. Визијата на компанијата е многу важна. Осигурајте се сите ваши вработени да ја разберат и живеат таа визија.

Како основач на компанија имав визија да креирам компанија кога ќе го промени глобалниот бизнис свет. Тоа беше мојата визија. Јас ја живеев таа визија. Верував во неа. Живеев за неа. Оваа визија беше мотивот да станам и да одам на работа. И сето ова е супер. Важно е да се има визија. Но она што е поважно е дали вашите вработени ја разбираат вашата визија. Ако вработените не ја разбираат, таа визија не ви вреди ништо. Таа визија ако не може да се имплементира е само сон кој засекогаш ќе остане сон. Најинтересно во целиот овој процес е тоа што вие како основач можеби мислите дека сите ја разбираат вашата визија но вистината е дека процесот на имплементирање на визијата е најтешкиот дел во водењете на сопствен бизнис. Мислејќи дека сите ја разбираат визијата на компанијата, за жал, изгубив некои луѓе на кои можеби ако подобро им објаснев што точно ние треба да правиме, сега ќе беа дел од мојата компанија наместо да работат за некој друг. Но, и тоа е дел од созревањето. Кога започнувате сопствен бизнис, не им ветувајте нереални работи на вработените. Размислете пред да им ветите било што. Кога започнувате сопствен бизнис повеќете од одлуките се резултат на вашата возбуденост. Едноставно, вие верувате во тој бизнис и имате сигурност дека работите ќе се одвиваат токму така како што вие ги замислувате.

Реалноста е дека секој бизнис треба природно да созрее и треба да помине низ одредени процеси пред да се доведе до ниво на стабилност. Додека не го доведете бизнисот на тоа ниво на стабилност кое ви е потребно, не ветувајте им на вработените работи кои не можете да ги исполните. Ако сакате да ги наградите, направете го тоа спонтано но никако не им ветувајте работи кои сте сигурни дека сакате да ги направите но за жал бизнис реалноста не ви го овозможува тоа. Не заборавајте, вработените ве гледаат како лидер и веруваат во тоа што ќе им го кажете. Моментот кога нема да можете да го исполните тоа што сте им го ветиле е моментот кога тие ќе ја изгубат довербата во вас но и во компанијата. Кога сте сопственик на компанија, апсолутно се е ваша одговорност. Од тоа дали има тоалетна хартија до тоа дали платите се исплатени на време. Ова можеби беше најтешката лекција за мене. Некогаш кога некој проект немаше да успее а време беше да се пуштат плати, во себе ги обвинував вработените поради ситуацијата во која се наоѓа компанијата.

Реалноста е дека секој подем но и секој пад е всушност само моја одговорност. Вработениот не треба да се грижи дали ќе има доволно за плата или дали ќе има доволно да се платат сите сметки овој месец. Не. Тоа е моја одговорност. Моја одоговорност е и ако некој проект не успеал. Да, други работеле можеби на проектот. Тие можеби биле повеќе инволвирани од мене во процесот. Во ред е тоа се но вистината е дека на крајот од денот јас сум одговорен за тој неуспех. Ако имате сопствена компанија ова мора да го прифатите. Не ја префрлувајте вината на вашите вработени. Тие не се основачи на компанијата. Вие сте. Преземете одговорност за се. Вработените се луѓе, тие не се роботи. И тие имаат живот. Никако, ни под разно, не им го правите животот потежок. Ако немате капацитет да ги задржите, пуштете ги да си ги исполнат сопствените соништа. Не треба да очекувате вашите вработени да поминуваат низ тоа што вие го поминувате. Не треба да очекувате и тие да се откажат од сопствениот живот и да гледаат во компанијата со вашите очи. Никако не го очекувајте ова. Вистината е дека не е секој подготвен да се откаже од сопствениот живот и потреби поради тоа што вие, како сопственик, сте решиле да го менувате светот. Секој вработен има свој живот. Нивниот живот зависи од вашата компанија. Ако вашата компанија не може да ги задоволи потребите на вработениот, реалноста е дека не го заслужувате тој вработен. Пуштете го да си оди и да си ги исполни сопствените соништа. Не ги правите вработените заложници на вашите соништа и идеји. Вие имате ваши соништа, тие имаат нивни. Ако не можете да ги задржите, без разлика на тоа колку вие сакате тие да да останат, вие морате, апсолутно морате да ги пуштите да си одат.

Никогаш не престанувајте да учите. Секогаш бидете подготвени за нови лекции. Водењето на компанија е процес на созревање и учење. Секогаш бидете подготвени за нови лекции. Секогаш. Никогаш, апсолутно никогаш немој да мислите дека знаете се. Вистината е дека никогаш нема да знаете се. Секогаш ќе постојат работи кои допрва ќе треба да ги научите. Знам, постојат моменти кога сте самоуверени и кога мислите дека знаете што правите но не заборавајте, се е тест. Ако сте подготвени на учење, тогаш ќе го поминете секој тест и во иднина можеби нема да ги правите истите грешки. Она што го научив е дека во процесот на креирање на продукт секогаш треба да размислувам како тоа да го правам прв пат во животот. Секогаш треба да бидам подготвен на се. Секогаш треба да ги имплементирам научените лекции но секогаш морам да бидам апсолутно спремен и за нови лекции.

Гледајќи наназад, горд сум што креиравме нешто уникатно од Македонија. Жалам за многу работи. Можеби ако некој ме подготвеше повеќе немаше да направам некои грешки. Можеби работите сега ќе беа поинакви. Можеби. Вистината е дека работите се секогаш такви какви што треба да бидат. И тоа е единственото нешто што ме води напред. Денес, после три години знам дека секој тест е всушност лекција. Лекција која ќе ме научи да бидат подобар менаџер но и подобар човек.

The post Пет работи кои би сакал некој да ми ги кажеше пред да започнам сопствен бизнис appeared first on Kosta Petrov.

Не знам зошто толку многу страв во мене од оваа бројка. Можеби поради тоа што го замислував поинаку мојот живот на овие години. Пред неколку години мислев дека до мојата 30та година ќе ги имам остварено сите мои соништа и дека конечно ќе можам да се опуштам и да уживам во сите благодети на животот. Знаев дека пред мене има уште многу пат за одење но некако наивно размислував дека 30тата година ќе ми биде година кога животот веќе нема да ми приредува неочекувани изненадувања. До некаде и сум бил во право.

Седејќи во мојата канцеларија и размислувајќи за сите работи кои ми се случија во овој лимитиран период на моето постоење, не можам а да не почуствувам благодарност за сите луѓе но и работи кои го направија мојот живот во најмала рака интересен но и полн со возбудливи моменти и спомени.

Приредени изненадување имаше премногу. Некои ме вивнаа кон врвот но некои од нив ме фрлија и во калта. Тоа што ги спојува сите нив е фактот дека во секое од нив се криеше лекција која ме правеше посилен и порешителен во остварувањето на моите соништа. Не велам дека сите соништа ми се исполнија, но силно верувам дека секој пад во мојот живот всушност беше лекција која го правеше процесот на исполнување на соништата многу полесен.
И искрено, денес на прагот на годината која најмногу ме плашеше, горд сум на себе и на луѓето околу мене бидејќи иако периодот на 30 години е можеби премал за да си ги исполнам сите соништа, сега знам дека со се што имам научено во овие 30 години, моите соништа и соништата на луѓето кои ги сакам, ќе се исполнат многу, многу побргу од очекуваното.

И што научив?
1. Апсолутно не е важно од каде си или од каде доаѓаат твоите. Многу поважно е каде сакаш ти да завршиш во животот.
2. Родителите, колку и некогаш да не не разбираат, се луѓето без чија подршка ниеден наш сон не може да стане реалност.
3. Некои луѓе се до тебе кога си на врвот но кога ќе паднеш во калта не се таму за да ти подадат рака. Семејството е тоа коа секогаш, ќе те следи насекаде. Ќе се радуваат со тебе кога си на врвот но и ќе ти подадат рака кога си во калта.
4. Големите работи во животот не доаѓаат лесно. Не ни треба да дојдат лесно бидејќи нема да ги цениме онолку колку што треба.
5. Издржливоста е најголемиот атрибут на сите големи лидери.
6. Успех не е дали ќе победиш или ќе изгубиш. Не е да освоиш прво место, не е колку пари ќе направиш или што ќе постигнеш. Успехот, всушност, не зависи од резултатот.
7. Важно е да веруваш во сопствените соништа но мора и да бидеме подготвени да претрпиме многу порази за да стигнеме до нив.
8. Секој човек може да се репрограмира. Процесот е тежок но и наградите се големи.
9. Не може секој да не сака, а не ни треба.
10. Пази се од моментот кога сите те фалат. Без баланс, нема успех.
11. Никогаш нема да можеш да почуствуваш вистинска љубов ако најпрвин не се сакаш и прифатиш себеси.
12. Не дозволувај позитивните коментари да те направат премногу горд но и негативните да те фрлат во депресија.
13. Не дозволувајте луѓето кои се откажале од сопствените соништа да ви кажуваат и вие да се откажете од вашите.
14. Ако имаш апсолутна сигурност во некоја работа, таа работа апослутно ќе стане твоја реалност.
15. Верувај во чуда. Тие ќе се појават тогаш кога најмалку очекуваш.
16. Најдобрата стратегија за остварување на вашите соништа е да не ги споделувате со другите се додека тие не се исполнат.
17. Кога не можете да си објасните зошто работите во вашиот живот се такви какви што се, не брзајте да ја пронајдете причината. Во ред е да не го знаеме одговорот.
Понекогаш вербата дека се се случува со причина е многу помоќна од дознавањето на причината.
18. Вашиот животен партнер треба да биде и вашиот најдобар пријател.
19. Заблагодари им на сите што го направиле твојот пат потежок. Тие луѓе донеле само добро во твојот живот. Извади го гневот од себе и заблагодари им за човекот што го направиле.
20. Повеќето од нашите врски и пријателства се распаѓаат бидејќи не ги прифаќаме луѓето такви какви што се. Секогаш очекуваме луѓето да се променат и да бидат такви какви што ние сакаме тие да бидат. Вистината е дека ние самите прво треба да се промениме и да бидеме пример за другите.
21. Работите се секогаш такви какви што треба да бидат. Проблемот е што ние со нашето размислување најчесто се лимитираме на сегашноста а не на големата слика.
22. Извинувањето не значи дека некој е во право а некој погрешил. Извинувањето значи дека луѓето ги цените повеќе од вашето его.
23. Секоја акција, било да е позитивна или негативна, резултира со позитивна или негативна реакција. Ако во себе сеете стравови за пад и неуспех, тогаш како очекувате успехот да дојде до вас?
24. Егото има неверојатна моќ. Можеме да постигнете милион успеси и сите тие да паднат во вода поради некој мал неуспех. Потсетувајте се на сите ваши достигнувања. Неверојатно е колку брзо забораваме на работите кои сме ги постигнале, кога неуспехот тропа на нашата врата.
25. Секоја предрасуда убива по еден наш сон.
26. Изворот на сета несреќа и неисполнети соништа во нашите животи е фактот што продолжуваме да живееме во комфорната зона. Вистинскиот живот, исполнет со апсолутно се што посакувате ве чека надвор од комфорната зона.
27. Во тешки моменти секогаш очекуваме некој да ни помогне и да не спаси. Никој не може да не спаси! Само самите себеси можеме да се спасиме. Нема потреба да бидеме жртви. Знам дека ни се случуваат лоши работи, знам дека не е лесно да се справиме со сите проблеми, но мораме, немаме друга опција! Погледнете ја ситуацијата и запрашајте се што можете да научите од неа.
28. Со вистинско и правилно менаџирање на својот талент можеме да си ги исполниме и најлудите соништа!
29. Во секој момент од нашите животи треба да споделуваме. Ако ги правиме работите само за себе и за да го нахраниме сопственото его, тогаш никогаш нема да научиме да бидеме среќни.

И најважната работа која ме води во секој момент од мојот живот- секогаш споделувајте ЉУБОВ. Кога споделуваме љубов, тогаш нема простор за предрасуди, тогаш нема да постојат и непријателите, тогаш ќе имаме и пари и здравје. Тогаш ќе имаме апсолутно се.

The post Коста Петров:30 работи што ги научив во изминативе 30 години appeared first on Kosta Petrov.

Изборот на најуспешна личност се одржува петти пат по ред, а од “Гемак трејд” велат дека одлучувачки критериуми во изборот се професионалноста и високиот морал во однесувањето, односно работи со позитивни ефекти врз заедницата кои делуваат мотивирачки за околината, квалитетни човечки вредности како и активности преку кои Македонија се промовира и надвор од границите.

Настанот беше збогатен со соодветна музичко сценска програма и интересна забава на која присуствуваа голем број личности  од јавниот и естрадниот живот на Скопје.

The post Коста Петров – Човек на годината 2013 appeared first on Kosta Petrov.

Колку и да звучи нереално, успехот нема никаква врска ни со петките, ни со факултетот ни со парите ни со наградите кои ќе ги добиете. Сите овие работи ние ги перципираме како успех но вистината е дека тие се застрашувачки далеку од вистинското значење на зборот УСПЕХ.

Кога добро ќе размислам и навратам на некои болни искуства во мојот живот сфаќам дека вистинскиот успех се случува во моментот кога ќе паднеш и кога сите твои желби и соништа изгледаат преамбицизни за да бидат твоја реалност. Токму во таа ситуација кога сиот свет околу нас се распаѓа се раѓа вистинскиот успех. Зошто?

Сите падови и предизвици всушност се тест. Сите овие работи ни се случуваат за да ја истестираат нашата издржливост но и подготвеност за битката која треба да ја добиеме за сите наши соништа да станат наша реалност.

И тогаш, во моментот кога сите бродови ти се потонати и не можеш да се кренеш од кревет бидејќи доста ти е од се, сфаќаш дека успех е да станеш и да се бориш без разлика на се. За мене, тоа е успех.

Успех е и да веруваш во себе и во сопствените соништа, без разлика на тоа што велат другите игнорирајќи го фактот дека сто пати си пробал да си ги исполниш соништата и сто пати не ти успеало.

Успех е да им испратиш љубов на сите оние кои секојдневно сеат омраза. Нив најпотребна им е љубовта. Испратете им ја.

Успех е да споделуваш со другите иако чувствуваш дека немаш доволно ни за себе.

Успех е да се насмееш, иако ти доаѓа да плачеш најгласно на свет.

Успех е да ги прегрнеш твоите родители и да им кажеш дека ги сакаш најмногу на свет. Дека без нивната помош никогаш немаше да можеш да успееш.

Успех е да немаш предрасуди кога ќе погледнеш некој кој го живее животот поразлично од тебе.

Успех е да им кажеш на пријателите дека се што се случува е испратено од универзумот и дека на крај се ќе биде во ред.

Успех е да се погледнеш наутро во огледало и да си кажеш, се гордеам со тебе.

Успех е и да им простиш на оние кои ти погрешиле. Без нивната помош никогаш нема да дознаеме што е всушност успех.

Успех е да преземеш одговорност за се во твојот живот.

Успех е да се бориш за тоа што го заслужуваш.

И најважно од се , успех е да се радуваш на туѓиот успех бидејќи достигнувањата на другите се доказ дека секој може да си ги оствари соништата , без разлика на околностите.

Ви посакувам година исполнета со УСПЕХ….

The post За успехот appeared first on Kosta Petrov.

Пи Ворлд е основана во 2010 година и е организатор на најголемите настани за маркетинг и односи со јавноста во светот. Компанијата е присутна во повеќе од 25 земји и редовно соработува со најголемите светски супербрендови како Фејсбук и Гугл.

Пи Ворлд е официјален партнер на престижниот магазин Економист во лАзербејџан а меѓу своите клиенти ги има и владата на Азербејџан. Компанијата неодамна ја креираше и кампањата за односи со јавноста на холивудската ѕвезда Мила Јовович.

„Навистина е огромна чест да се биде дел од оваа листа. Иако само моето име е напишано на листата сепак успехот на Пи Ворлд се должи на макотрпната работа на мојот тим без кој ниеден наш сон немаше да биде реалност”, изјави Коста.

The post Коста Петров на листата на 30 – те најмоќни луѓе во индустријата за настани во југоисточна Европа appeared first on Kosta Petrov.

Што има направено тој Коста Петров за Македонија? Свадбата сакам да ми ја организира Коста Петров! Колку книги продал овој Коста за да има најпродавана книга-10?

Ова се само некои од коментарите кои пристигнаа на мојата адреса во последните година и пол. Стигнаа и многу позитивни и охрабрувачки пораки но човечкиот ум знае некогаш да си игра многу валкани игри со нас. Некогаш доволно е само една мала негативна порака или мисла за да сето она што макотрпно сте го граделе со години падне во вода.

Чувството кога читате навредувачки пораки упатени кон вас е нешто што не би сакал да му го посакам никому. Ви се превртуваат цревата во стомакот. Ве обзема тага, па бес. Се прашувате што сте им згрешиле на овие луѓе што толку ве навредуваат. Болката е уште поголема кога ќе дознаете дека и луѓе со кои се познавате и со кои сте делеле спомени, исто така влегуваат во дискусии за тоа каков човек сте вие и ред други работи.

Најстрашно во целата оваа ситуација е тоа што толку многу убави работи ви се случуваат во животот а вие сепак се концетрирате на некои мали негативни мисли кои немаат никаква врска со реалноста. И тогаш всушност доаѓа најголемата лекција во целата оваа ситуација.

Вистината е дека секогаш ќе постојат луѓе кои ќе ве исмејуваат. Луѓе кои ќе ви кажуваат дека вашите соништа се глупави и нема шанси да се остварат. Луѓе кои ќе ви се смеат кога ќе паднете и ќе ве омаловажуваат кога ќе постигнете нешто. Е сега, прашањето е, што да се прави со овие луѓе?

Одговорот е едноставен- НЕ РЕАГИРАЈТЕ! На крајот од денот секој има право на свое мислење. Она што е апсолутно важно е никогаш да не дозволите негативнити мисли на другите луѓе да влијаат врз вашиот живот и вашите соништа. Ако се откажете од вашите соништа на првата негативна критика или на првото тролање тогаш вистината е дека не заслужувате вашиот сон да стане реалност.

Еден мој пријател кога дискутираме на оваа тема секогаш ми вели, Коста, не дозволувај луѓет кои се откажале од своите соништа, да ти кажуваат ти да се откажеш од твоите. Токму во оваа реченица се крие тајната на успехот. Метафорички кажано, сите овие луѓе имаат една единствена функција во вашиот живот- да ве тргнат од патот по кој сте создадени да одите. Но не само да ве тргнат од патот. Тие не сакаат вие да го направите ни првиот чекор. Затоа болката кај некои поединци кога ќе видат дека некој е успешен е толку голема. Тогаш тие во тој момент сфаќаат дека некој тргнал по својот пат и си ги остварува сопствените соништа додека тие се плашат да го направат и првиот чекор.

Друга многу важна работа. Животот е преубав. Полн со убави моменти. Полн е со лекции кои ќе ве направат подобар човек. Не го трошите времето на луѓе кои сеат омраза. Знам дека е тешко и знам дека боли но секоја минута потрошена на нечија негативна енергија се 60 секунди од уживањето во сите благодети во вашиот живот. Работите на своите соништа и креирајте го животот кој го заслужувате.

Најважно од се, никогаш, апсолутно никогаш, не ставајте се во позиција да го објаснувате вашиот успех. Луѓето кои се важни во вашиот живот, ќе знаат низ што се не сте поминале за да си ги остварите сопствените соништа. Тие ќе се радуваат на вашиот успех исто како да е нивен. И само тие луѓе се важни.

Пред неколку години кога работевме на еден проект кој требаше да ги слави успешните луѓе во Македонија, еден наш познат гитарист ми кажа- успехот во Македонија никој нема да ти го прости. Долго време размислував околу ова и колку и да звучи вистинито, не се согласувам со тоа дека требате да барате од некого да ви го прости успехот. Во успехот се ужива и се радува и кога тој се случува најглупавото нешто што можете да го направите е да барате некој да ви го прости истиот.

Кога ќе ви се случи успехот, уживајте во сите благодети што тој ќе ви го донесе. Споделете ги научените лекции и помогнете им на другите да тргнат по својот пат. Бидете пример за нив дека соништата можат да се остварат, без разлика на тоа колку невозможно некогаш тоа изгледа.

А на оние, кои ќе плукаат по вас и кои ќе го оспоруваат вашиот успех, испратете им љубов и посакајте им успех на секое поле. Посакајте им и нивните соништа да станат реалност и бар еднаш во животот да ја почуствуваат радоста при исполнет животен сон.

The post Не дозволувајте луѓето кои се откажале од своите соништа да ви кажуваат вие да се откажете од вашите! appeared first on Kosta Petrov.

Не ме сфаќајте погрешно. Водењето на сопствена компанија е многу подобро од тоа што го замислував но во исто време и многу потешко од тоа што јас лично очекував.

Четири години и 20 освоени земји подоцна размислувам што ќе беше ако никогаш не отворев сопствена компанија. Дали можеби ќе бев посреќен? Дали можеби ќе правев повеќе пари? Дали полесно ќе спиев навечер? Ќе имав повеќе време за моето семејство? Повеќе време за самиот себе? Верувам дека повеќето од луѓето кои водат сопствени компании се прашуваат истото. Одговорите можеби никогаш нема да дојдат но она во што сум сигурен е дека водењето на сопствена компанија е можеби најголемата одговорност што некој може да ја има бидејќи кога водиш сопствена компанија освен одговорноста за себе и сопственото семејство на твој грб се и судбините на твоите вработени и нивните семејства.
Не ми е целта преку оваа колумна да ви солам памет и да ве советувам што треба да правите или да не правите за да бидете успешни. Целта ми е да споделам со вас неколку мои искуства кои ги скршија митовите кои јас ги имав за водењето на сопствен бизнис.

1. Ќе отворам сопствен бизнис бидејќи сакам да работам самиот за себе.

Звучи познато нели? Повеќето од нас отвараат сопствен бизнис бидејќи им е смачено да работат за некој друг. Нема никаков проблем во тоа. Проблемот е во тоа што кога имаш сопствена компанија најмалку работиш за себе. Работиш за платите на вработените, за сметките на компанијата, за плаќање на долговите и многу често се случува ништо да не остане за тебе. И тогаш во тој момент сфаќаш дека ако причината да отвориш сопствен бизнис ти била само за да работиш за самиот себе подобро и да не си отворил сопствен бизнис.

2. Најтешкиот дел е да отворам сопствена компанија. Штом ќе отворам сопствен бизнис се ќе биде полесно.

Погрешно. Отварањето на компанија е всушност најлесниот дел од процесот на водење на сопствен бизнис. Дури и првата година е лесна во споредба со тоа што ве очекува во втората, третата, четвртата година и така натака. Да бидам јасен, нема ништо лесно во водењето на сопствениот бизнис. Предизвиците секојдневно ќе чукаат на вашата врата. Клучот на успехот е како ќе се справите со овие предизвици. Ако ги гледате како нешто што го попречува работењето на вашата компанија тогаш многу брзо ќе останете без компанија но ако ги гледате како лекции тогаш секој предизвик ќе биде само уште едно скалило до успехот на вашата компанија.

3. Кога ќе отворам сопствена компанија никому нема да должам. Сите ќе ги исплаќам на време

Татко ми скоро 15 години се утепува од работа. И самиот сум бил сведок на моменти кога некој проект е завршен а наплатата доцни со месеци. Токму поради тоа кога отворав сопствена компанија најголемата желба ми беше сите да ги исплаќам на време и никому да не должам пари. За жал реалноста беше различна од моите очекувања. Доволно е некој вас да ви должи и поради тоа вие на некој друг да му должите и на крај се создава еден магичен круг од кој многу тешко се излегува.
Вистината е дека никогаш нема да бидете на 0 во компанијата со долгови. Секогаш ќе се случи нешто што ќе ви ги попречи плаќањата. Мојот совет е да не се криете во вакви ситуации и да бидете искрени. Разговарајте со вашите партнери и обидете се да дојдете до некакво заедничко решение. Најлошото што можете да го направите кога некому должите пари е да се криете и да ги игнорирате.

4. Кога ќе имам сопствена компанија ќе ги вработам најдобрите менаџери и тие ќе се грижат за бизнисот. Јас само ќе делегирам.

Менаџерите треба ти ги создадеш а не да ги вработиш. И ова е можеби најтешкиот дел од водењето на сопствена компанија. Процесот на креирање на менаџери може да трае неколку години. Некогаш се случува луѓето кои верувате дека ќе бидат добри менаџери да всушност немаат капацитет да менаџираат и процесот треба да го започнете од ново со некој друг. Но не грижете се, Ако работите внимателно ќе дојде моментот кога ќе создадете супер тим и тек тогаш ќе можете да започнете со делегирање. А до тогаш, инвестирајте во вашите луѓе. Не ви требаат роботи, ви требаат луѓе кои размислуваат со своја глава.

5. Мене сите вработени ќе ме сакаат. Јас ќе бидам најдобриот директор на свет.

Не може сите вработени да ве сакаат. Помирете се со ова. Најважно е вработените да ве почитуваат и да веруваат во вашата идеја. Се друго ќе си дојде со тек на време. Ќе има и случки кога некои ваши поранешни вработени ќе зборуваат колку сте вие лош директор и колку тоа не знаете да ја менаџирате компанијата. И тоа е во ред. Никој не е совршен. Сите учиме, Посакајте им успех на идното работно место и продолжете да чекорите напред.

6. Јас се убаво ви објаснив. Не ми е јасно како можевте да оплескате.

Колку ли пати ова го правев на почетокот? Ќе киксне некој проект и одма ќе ги обвинував вработените за неуспехот. Не сум знаел поинаку. Вистината е дека секој успех но и неупсех на компанијата е ваша одговорност. Не ви се криви вработените. Вие сте одоговорни за се. Најлесно е да обвиниш некој друг за неуспехот на компанијата. Размисли добро. Можеби погрешен човек си ставил на тој проект. Можеби не си ги менаџирал добро. Можеби не си им објаснил доволно. Можеби не си бил строг доволно. Како и да е, одговорноста е твоја. Не на твоите вработени.

7. Не ми е јасно зошто не одговараат на телефон. Па што ако е викенд. Не значи дека светот запрел бидејќи за нив е викенд.

Расчистете еднаш засекогаш. Компанијата е ваша а вработените работат за вас но компанијата не е нивна. Немој да очекувате дека ќе ја сакаат компанијата како што вие ја сакате. Не ни треба. Таа компанија е ваш сон, не нивен. Не очекувајте да остават се зад себе и да се фокусираат само на тоа што и е потребно на компанијата.

Бидејќи сме глобална компанија, многу често се случува земјите каде што работиме да работат и во недела и во сабота. Се случува и ние да не сме во канцеларија бидејќи е некој празник а во земјите каде што работиме е нормален работен ден. И може да се случи некој да не бара но не може да не добие. И тоа е во ред. Не очекувајте луѓето да се однесуваат како роботи ниту да бидат ваши робови. Оставете ги да си ги живеат сопствените животи. Ако се тие среќни и вашиот бизнис ќе биде стабилен. Еден пропуштен повик не значи крај на бизнисот

8. Јас се утепувам од работа, а немам пари а нашиве конкуренти се шират насекаде.

Не споредувајте се премногу со конкуренцијата. Убаво е да се има конкуренција. Здраво е и за вас и за нив. И тука завршува приказната. Ако отворате компанија бидејќи гледате дека некој прави многу пари во тој бизнис па и вие сакате дел од колачот најверојатно за многу кратко време ќе го затворите бизнисот. Вашиот бизнис е ваш бизнис. Тоа е ваша идеја. Вие го одите вашиот бизнис пат а конкуренцијата нивниот. Вистината е дека не ја знаете вистинската причина поради растот на вашата конкуренција. Можеби имаат инвеститор. Можеби имаат земено голем кредит. Не е важно. Обидете се да бидете подобри и поиновативни од нив а не да ги копирате и да се замарате зошто тие се шират а вие не. Ќе дојде моментот кога и вие ќе ги остварите сите ваши бизнис цели. Тоа ќе го направите само ако сте единствени и развиете ваш бизнис модел а не да копирате што прават другите.

9. Мојата компанија ќе биде како Гулг. Ќе има опуштена атмосфера и вработените ќе имаат тотална слобода да работат на своите идеји.

Гулг е Гугл. Вие не сте Гугл и нема да бидете Гугл. Престанете да ги копирате моделите на работење на другите компании. Тоа што функционира во Гугл нема да функцира кај вас. Не можете како старт ап веднаш да развиете Гугл култура. Не се ни обидувајте. Единствен начин да успеете е да креирате ваш бизнис модел и ваша култура. Ќе треба време за тоа и ќе направите мал милион грешко но ако сте трпеливи и ако брзо учите ќе го најдете најдобриот модел за вас. Гугл може да ви биде пример за тоа како се развива добра бизнис култура. И тука треба да заврши таа дискусија.

10. Ќе отворам своја компанија. Ќе ја направам успешна и после ќе ја продадам и ќе бидам милионер.

Ако отворате компанија за еден да ја продадете и да бидете милионер веројатноста дека тоа ќе ви се случи е многу мала. Инвеститорите и бизнис ангелите многу добро знаат која компанија има вистинска цел а која е креирана за да биде купена. Не бидете очајни да го продадете вашиот бизнис. Не ширите информации дека го продавате вашиот бизнис. Создадете репутација на успешен бизнис, бидете успешни и ако еден дојде моментот да го продадете својот бизнис и да станете милионер супер за вас. Но целта никако, никогаш не смее да ви биде продажба.
Имам неколку другари кои ја имаат продадено својата компанија и поради нивната неинформираност завршиле неславно. Ако се случи некој да сака да ја купи вашата компанија разговарајте добро со вашиот адвокат и со луѓе кои имаат искуство во продажба на сопствен бизнис. Не дозволувајте на крајот од денот вашата идеја и макотрпната работа бидат залудни.
Водењето на бизнис е тешко но нема поубаво чувство од тоа да крерате успешна компанија и успешен тим. Учете и споделувајте. Некогаш поради ИКС причини можеби бизнисот нема да ви успее. Не очајувајте. Бидете трпеливи бидејќи трпеливоста и издржливоста се најголемите атрибути на сите големи лидери.

The post Коста Петров: 10 митови за водењето на сопствен бизнис appeared first on Kosta Petrov.